বৰ্ষাপাৰাৰ ষ্টেডিয়ামত মুখ্যমন্ত্রী হিমন্ত বিশ্ব শৰ্মা

গুৱাহাটী,২৯ জুনঃ অসমৰ ক্ৰীড়া ইতিহাসৰ আজি এক সোণালী দিন। আজি বৰ্ষাপাৰাৰ অসম ক্ৰিকেট সন্থাৰ ষ্টেডিয়ামত অত্যাধুনিক জিমনেছিয়াম আৰু অভ্যৰ্থনা কক্ষৰ শুভ উদ্বোধনৰ লগতে অসম চৰকাৰে প্ৰদান কৰা ১১ বিঘা মাটিত ৭০০খন বাহন ৰাখিব পৰাকৈ পাৰ্কিং আৰু বাণিজ্যিক চৌহদৰ নিৰ্মাণকাৰ্যৰ আধাৰশিলা স্থাপন কৰা হয়। এই উপলক্ষে আয়োজন কৰা অনুষ্ঠানত অংশ গ্ৰহণ কৰে মুখ্যমন্ত্রী হিমন্ত বিশ্ব শৰ্মাই। তৃণমূল পৰ্যায়ৰ পৰা প্ৰতিভাসমূহ চিনাক্ত কৰি তেওঁলোকক খেলৰ অনুশীলনৰ বাবে উপযুক্ত সা-সুবিধা প্ৰদান কৰাৰ লগতে ৰাজ্যৰ বিভিন্ন প্ৰান্তত সিঁচৰতি হৈ থকা ক্ৰীড়া প্ৰতিভাসমূহক উপযুক্তভাৱে গঢ়ি তুলিবলৈ অসম চৰকাৰে ৰাজ্যজুৰি ক্ৰীড়া আন্তঃগাঁথনি সবল কৰিবলৈ পদক্ষেপ লৈছে। পৰৱৰ্তী অলিম্পিক পৰ্যন্ত লাভলীনা বৰগোহাঁইৰ প্ৰশিক্ষণত নিয়োজিত ব্যক্তিগত প্ৰশিক্ষকগৰাকীক প্ৰতিমাহে ২.৫ লাখ টকাকৈ প্ৰদান কৰিবলৈ পদক্ষেপ লোৱা হৈছে। দৌৰবিদ হিমা দাসৰ প্ৰশিক্ষণৰ বাবেও সাহায্য আগবঢ়োৱা হৈছে। কমেও ২৫০গৰাকী খেলুৱৈ থাকিব পৰাকৈ সৰুসজাইত গেমছ ভিলেজ নিৰ্মাণৰ পৰিকল্পনা কৰা হৈছে। কমনৱেলথ গেমছ, এছিয়ান গেমছ আৰু অলিম্পিক গেমছত পদকপ্ৰাপকসকলৰ বাহিৰেও যিকোনো বিশ্ব চেম্পিয়নশ্বিপত পদকপ্ৰাপকক ক্ৰীড়া পেঞ্চন প্ৰদান কৰাৰ ব্যৱস্থা কৰা হ’ব। নিযুক্তিৰ ক্ষেত্ৰতো খেলুৱৈসকলৰ বাবে পদ সংৰক্ষণৰ দিশটোত চিন্তা-চৰ্চা কৰি থকা হৈছে। অনুষ্ঠানত উত্তৰ কাছাৰ স্বায়ত্তশাসিত পৰিষদৰ মুখ্য কাৰ্য্যবাহী দেৱলাল গাৰ্লোছা, অসম ক্ৰিকেট সন্থাৰ সভাপতি ৰমেন দত্ত, সম্পাদক দেৱজিৎ শইকীয়া, অসম ক্ৰিকেট সন্থাৰ এপেক্স কাউঞ্চিলৰ সদস্যসকল প্ৰমুখ্যে গণ্য-মান্য ভালেকেইগৰাকী লোক উপস্থিত আছিল।