লখিমপুৰৰ ন-কদম গাঁও পঞ্চায়ত এলেকাত বিজেপিৰ ব্যাপক নিৰ্বাচনী প্ৰচাৰ  কুচিয়ামাৰীত নিৰ্বাচনী প্ৰচাৰ কাৰ্যালয় মুকলি

লখিমপুৰ, ৩০ মাৰ্চ — প্ৰথম পৰ্যায়ত ভোটগ্ৰহণ অনুষ্ঠিত হ’বলগা ১২ নং লখিমপুৰ লোকসভা সমষ্টিৰ বিজেপি দলৰ প্ৰাৰ্থী প্ৰদান বৰুৱাৰ সপক্ষে আজি লখিমপুৰৰ ন-কদম গাঁও পঞ্চায়ত এলেকাৰ ভিন্ন প্ৰান্তত বিধায়ক মানৱ ডেকাসহ বিজেপিৰ একাংশ নেতা-কৰ্মীয়ে ব্যাপক প্ৰচাৰ অভিযান চলায়। জানিব পৰা মতে, বিজেপি দলৰ নেতা-কৰ্মীসকলে পঞ্চায়ত এলেকাটোৰ টিপুকিয়াল, লামু-আজাৰগুৰি, যোৰহটীয়া, চৰাইমৰীয়া, বালিগাঁও, মাজগাঁও, কাচিকটা, হৰিদাস, বেৰকেপ, সোনোৱাল গাঁও, কাৱৈমাৰী আৰু মঘুৱাচুক গাঁৱত প্ৰচাৰ অভিযান চলায়। এই প্ৰচাৰ অভিযানকালত বিধায়ক মানৱ ডেকাই উন্নয়ন আৰু প্ৰগতিৰ স্বাৰ্থত বিজেপি প্ৰাৰ্থীগৰাকীক ভোটদান কৰিবলৈ ৰাইজক আহ্বান জনায়। ভাষণ প্ৰসংগত তেওঁ কংগ্ৰেছ দলৰ প্ৰাৰ্থীগৰাকীক ভোট দিলে ৰাইজৰ ভোটটো অথলে যাব বুলি কৈ ৰাইজক সদায় মৰম আৰু আদৰেৰে আঁকোৱালি লৈ অহা প্ৰদান বৰুৱাক পদুম ফুলৰ চিনত ভোট দি জয়যুক্ত কৰিবলৈ আহ্বান জনায়। এই প্ৰচাৰ অভিযানৰ বেলিকাই বিধায়ক মানৱ ডেকাই কুচিয়ামাৰীত বিজেপিৰ এটা নিৰ্বাচনী প্ৰচাৰ কাৰ্যালয় ফিটা কাটি উদ্বোধন কৰে।