গুৱাহাটী,২০ জুনঃ অসম প্ৰকাশন পৰিষদৰ সভাঘৰত শিক্ষামন্ত্রী তথা অসম প্ৰকাশন পৰিষদৰ অধ্যক্ষ ডাঃ ৰণোজ পেগুৱে আজি মুকলি কৰে ‘পদ্মনাথ শ্ৰব্য অভিধান’৷ অসম প্ৰকাশন পৰিষদে তিনি-চাৰি বছৰ ধৰি একাণপতীয়া প্ৰচেষ্টাৰে প্ৰস্তুত কৰি উলিওৱা এই অভিধানখনিয়ে অসমীয়া ভাষাক এক মৰ্যাদাপূৰ্ণ স্থানলৈ উন্নীত কৰাত সহায়ক হ’ব। উল্লেখ্য যে এই অভিধানখনত শব্দ, শব্দৰ অৰ্থৰ লগতে উপ-শব্দ আৰু এই উপ-শব্দৰ অৰ্থসমূহ থকাৰ উপৰি ডিজিটেল মাধ্যমত এই শব্দসমূহৰ ধবনিও উপলব্ধ হ’ব৷ ইয়াৰ বাহিৰেও আন্তঃৰাষ্ট্ৰীয় ধ্বনিলিপি‍ সম্বলিত আৰু প্ৰতিটো শব্দৰ ইংৰাজী অৰ্থ থকা এইখনেই হৈছে প্ৰথম অসমীয়া ডিজিটেল শ্ৰব্য অভিধান। ভাষাৰ বিকাশ, প্ৰচাৰ আৰু প্ৰসাৰত অভিধানে এক গুৰুত্বপূৰ্ণ ভূমিকা গ্ৰহণ কৰিছে৷ বৰ্তমানৰ ডিজিটেল যুগত এনে অভিধান ভাষাৰ বিকাশৰ দিশটো অতি গুৰুত্বপূৰ্ণ বিষয়৷ ডিজিটেল মাধ্যমৰ লগতে শ্ৰব্য ৰূপত এখন অভিধানৰ প্ৰয়োজনীয়তা আৰু গুৰুত্ব অসমীয়া ভাষাক ভালপোৱা প্ৰতিগৰাকী ব্যক্তিয়ে উপলব্ধি কৰে৷ বৰ্তমানে কম্পিউটাৰ আৰু মোবাইল ফোনৰ বহুল ব্যৱহাৰৰ বাবেই আমাৰ সমলবোৰ এই জগতত উপলব্ধ কৰাৰ কোনো বিকল্প নাই৷ অসম প্ৰকাশন পৰিষদে অসমীয়া ভাষাৰ প্ৰযুক্তিগত বিকাশৰ বাবে বিভিন্ন দিশত চিন্তা-চৰ্চা কৰি অহাৰ ফলশ্ৰুতিতে‍ এনে এখন অভিধান অসমত পোন প্ৰথমবাৰৰ বাবে প্ৰস্তুত কৰিবৰ বাবে প্ৰচেষ্টা হাতত লোৱা হৈছিল৷ এই অভিধানখনৰ তাত্ত্বিকদিশৰ লগত ভিন্ন সময় ধৰি জড়িত কেইগৰাকীমান উৎসাহী আৰু অভিজ্ঞ ব্যক্তিৰ সহযোগতেই ‘পদ্মনাথ শ্ৰব্য অভিধান’ আজি ৰাইজৰ হাতত তুলি দিব পৰা হৈছে৷ অসম সাহিত্য সভাৰ প্ৰথমগৰাকী সভাপতি সাহিত্যকাণ্ডাৰী পদ্মনাথ গোহাঞিবৰুৱাৰ প্ৰতি শ্ৰদ্ধা জনাই তেখেতৰ নামেৰেই ‘পদ্মনাথ শ্ৰব্য অভিধান’ বুলি নামকৰণ কৰাৰ সিদ্ধান্ত গ্ৰহণ কৰা হয়৷ ২০২০ চনত এই প্ৰকল্পটোৰ কাম আৰম্ভ কৰা হৈছিল। প্ৰসংগতে উল্লেখ কৰাৰ প্ৰয়োজন যে এই ডিজিটেল অভিধানখনৰ ভেটি হিচাপে গ্ৰহণ কৰা হৈছিল ডক্টৰ মহেশ্বৰ নেওগ, ৰজনীকান্ত দেৱশৰ্মা আৰু নৱকান্ত বৰুৱাৰ দ্বাৰা সংকলিত আৰু সুমন্ত চলিহাৰ দ্বাৰা সংশোধিত আৰু সম্পাদিত ‘আধুনিক অসমীয়া অভিধান’ৰ একবিংশ সংস্কৰণটো৷ উক্ত অভিধানখনত মূল আধুনিক অসমীয়া অন্তৰ্ভুক্ত নোহোৱা আন্তঃৰাষ্ট্ৰীয় ধ্বনি লিপি আৰু ইংৰাজী অৰ্থ সংযোগ কৰাৰ বাবেও সিদ্ধান্ত গ্ৰহণ কৰা হৈছিল৷ সেই সূত্ৰে এইখন অভিধানক আন্তঃৰাষ্ট্ৰীয় ধ্বনিলিপি সম্বলিত প্ৰথম অসমীয়া ডিজিটেল শ্ৰব্য অভিধান বুলি ক’ব পাৰি৷ মন কৰিব লগা যে অভিধানখন প্ৰথমতে কেৱল কম্পিউটাৰত ব্যৱহাৰৰ বাবে প্ৰস্তুত কৰি উলিওৱাৰ সিদ্ধান্ত গ্ৰহণ কৰা হৈছিল যদিও প্ৰয়োজনীয়তা আৰু ব্যৱহাৰযোগ্যতাৰ প্ৰতি দৃষ্টি ৰাখি অভিধানখন মোবাইল ফোনৰ এপ হিচাপেও মুকলি কৰাৰ সিদ্ধান্ত গ্ৰহণ কৰা হয়৷ এই অভিধানখনৰ এপটো মোবাইল ফোনৰ প্লে-ষ্ট’ৰলৈ গৈ Padmanath Audio Dictionary টাইপ কৰি চাৰ্চ
কৰিলেই পোৱা যাব৷ আগ্ৰহীসকলে প্লে-ষ্ট’ৰৰ পৰা Padmanath Audio Dictionary এপটো মোবাইল ফোনত সহজেই ইনষ্টল কৰি ল’ব পাৰিব। আজি প্ৰকাশন পৰিষদৰ বামুণীমৈদামস্থিত কাৰ্যালয়ৰ সভাগৃহত আয়োজিত এটি অনুষ্ঠানত এই অভিধানখনি উন্মোচন কৰি
পৰিষদৰ অধ্যক্ষ ডাঃ ৰণোজ পেগুৱে কয়–‘এখন ছপা অভিধান আৰু এখন শ্ৰব্য ডিজিটেল অভিধানৰ প্ৰস্তুত কাৰ্য একে নহয়৷ কিন্তু এই কাৰ্য সম্পন্ন কৰিবলৈ লওঁতে ভবাতকৈও অধিক জটিলতাৰ সন্মুখীন হোৱা দেখা গ’ল৷ এই সকলোবোৰ জটিলতা নেওচি অৱশেষত অভিধানখনি কম্পিউটাৰৰ লগতে মোবাইল ফোনৰ এপ হিচাপেও মুকলি কৰি দিবলৈ পাই অতি আনন্দিত হৈছোঁ৷ অভিধান প্ৰণয়ন আৰু পৰিবৰ্ধন এটা নিৰৱচ্ছিন্ন প্ৰক্ৰিয়া৷ অভিধানখনৰ এই সংস্কৰণত অজানিতে থাকি যোৱা ত্ৰুটিসমূহ পৰৱৰ্তী পৰ্যায়ত শুধৰণি কৰা হ’ব আৰু পৰ্যায়ক্ৰমে ইয়াৰ পৰিবৰ্ধন কৰাৰো প্ৰয়াস অব্যাহত ৰাখিবলৈ প্ৰকাশন পৰিষদ যত্নপৰ হ’ব৷ এনে এটা জটিল কাৰ্য সম্পন্ন কৰাৰ বাবে প্ৰকল্পটোৰ সৈতে জড়িত প্ৰতিগৰাকী ব্যক্তিলৈ আন্তৰিক ধন্যবাদ জ্ঞাপন কৰিছোঁ আৰু ব্যৱহাৰকাৰীৰ সমাদৰৰ লগতে যুক্তিসন্মত পৰামৰ্শ আগবঢ়ালে পৰিষদৰ শ্ৰম সার্থক হোৱা বুলি অনুভৱ কৰিম৷’ উল্লেখ্য যে অনুষ্ঠানত প্ৰকাশন পৰিষদৰ সচিব প্ৰমোদ কলিতা, বিশিষ্ট অভিধানিক সুমন্ত চলিহা আৰু শ্ৰব্য অভিধান প্ৰস্তুতিৰ সৈতে জড়িত ব্যক্তিসকল উপস্থিত আছিল।