লখিমপুৰত সুদখোৰৰ বিৰুদ্ধে আৰক্ষীৰ অভিযান জিলাখনৰ ভিন্ন স্থানৰ পৰা আৰক্ষীয়ে আটক কৰিছে ২৬ জন সুদখোৰক 

লখিমপুৰ, ১৯ ফেব্ৰুৱাৰী ; ৰাজ্যৰ বিভিন্ন প্ৰান্তত সুদখোৰৰ বিৰুদ্ধে আৰক্ষীয়ে অভিযান চলাই থকাৰ সময়তে আজি লখিমপুৰ জিলাৰ আৰক্ষীয়ে জিলাখনৰ বিভিন্ন প্ৰান্তৰ পৰা ২৬ জন সুদখোৰক আটক কৰে । আজি এই সন্দৰ্ভত আৰক্ষীয়ে জানিবলৈ দিয়া মতে – আৰক্ষীয়ে ইতিমধ্যে জিলাখনৰ বিহপুৰীয়া থানা এলেকাৰ পৰা ৮ জন , লখিমপুৰ সদৰ থানা এলেকাৰ পৰা ৪ জন নাৰায়ণপুৰ আৰক্ষী চকীৰ এলেকাৰ পৰা ৫ জন, নাওবৈচাৰ পৰা ৫ জন, ঘিলামৰাৰ পৰা ১ জন, ঢকুৱাখনাৰ পৰা ১ জন সুদখোৰ আটক কৰিছে। আৰক্ষীয়ে এই অভিযান কালত সুদখোৰৰ পৰা জব্দ কৰিছে বন্ধকত লোৱা মটৰ চাইকেল, চেক, এ টি এম কাৰ্ড, মাটিৰ দলিল, এল.আই.চি. পলিচি আদি বিভিন্ন তথ্যপাতি । এই সন্দৰ্ভত অতিৰিক্ত আৰক্ষী অধীক্ষক মুনিন্দ্ৰ দেউৰী (HQ)য়ে জানিবলৈ দিয়া মতে -যোৱা নিশা অবৈধ সুদখোৰৰ বিৰুদ্ধে আৰক্ষীয়ে এই অভিযান চলাইছিল । উক্ত সুদখোৰ সকলে অনুজ্ঞাপত্ৰৰ নীতি নিয়ম অমান্য কৰি অত্যাধিক সূতত টকা লৈছিল । ৫ৰ পৰা ১৫ শতাংশ পৰ্যন্ত সুত অবৈধ সুদখোৰে ইচ্ছানুসৰি লৈছিল । লখিমপুৰত এক বৃহৎ চক্ৰ এই ব্যৱসায়ৰ লগত জড়িত আছে বুলি উল্লেখ কৰি আৰক্ষীৰ অনুসন্ধান অব্যাহত থকা বুলি সাংবাদিকৰ সন্মুখত সদৰি কৰে