কংগ্ৰেছ আৰু মিত্রজোঁটৰ বহু কেইগৰাকী প্ৰাৰ্থীয়ে দাখিল কৰিলে মনোনয়ন পত্র : সংগ দিলে প্ৰদেশ কংগ্ৰেছৰ সভাপতি গৌৰৱ গগৈয়ে

গুৱাহাটী,২০ মাৰ্চ : সমাগত বিধানসভা নিৰ্বাচনৰ বাবে বৰ্তমান ৰাজ্যত অব্যাহত আছে মনোনয়ন দাখিলৰ পৰ্ব। শুকুৰবাৰৰ দিনটোত প্ৰদেশ কংগ্ৰেছৰ কেবাজনো মনোনীত প্ৰাৰ্থীৰ লগতে মিত্ৰজোঁটৰ প্ৰাৰ্থীসকলে মনোনয়ন পত্ৰ দাখিল কৰে। সেইমৰ্মে বিৰোধী দলৰ নেতা দেৱব্ৰত শইকীয়াই নাজিৰা বিধানসভা সমষ্টিৰ বাবে কংগ্ৰেছ দলৰ হৈ প্ৰাৰ্থিত্বৰ আবেদন লৈ মনোনয়ন পত্ৰ দাখিল কৰে। শিৱসাগৰ জিলা উপায়ুক্তৰ কাৰ্যালয়ত দেৱব্ৰত শইকীয়াৰ লগতে ৰাইজৰ দলৰ সভাপতি বিধায়ক তথা মিত্ৰজোঁটৰ শিৱসাগৰৰ প্ৰাৰ্থী অখিল গগৈয়েও নিজৰ মনোনয়ন দাখিল কৰে। আনহাতে খোৱাং সমষ্টিৰ বাবে ডিব্ৰুগড় জিলা উপায়ুক্তৰ কাৰ্যালয়ত মনোনয়ন পত্ৰ দাখিল কৰে মিত্ৰজোঁটৰ প্ৰাৰ্থী তথা অসম জাতীয় পৰিষদৰ সভাপতি লুৰীণজ্যোতি গগৈয়ে। একেদৰে ডিব্ৰুগড় লোকসভা সমষ্টিৰ অন্তৰ্গত টিংখং বিধানসভা সমষ্টিৰ প্ৰাৰ্থী বিপুল গগৈ, নাহৰকটীয়া বিধানসভা সমষ্টিৰ প্ৰাৰ্থী প্ৰণতি ফুকন, দুলীয়াজান বিধানসভা সমষ্টিৰ কংগ্ৰেছ দলৰ প্ৰাৰ্থী ধ্ৰুৱজ্যোতি গগৈ, ৮৭ নং চাবুৱা-লাহোৱাল বিধানসভা সমষ্টিৰ প্ৰাৰ্থী প্ৰাঞ্জল ঘাটোৱাৰ আৰু ডিব্ৰুগড় সদৰ সমষ্টিৰ বিৰোধী ঐক্যৰ উমৈহতীয়া প্ৰাৰ্থী মৈনাক পাত্ৰই সমৰ্থকসকলক লগত লৈ অসম প্ৰদেশ কংগ্ৰেছ কমিটিৰ সভাপতি গৌৰৱ গগৈ উপস্থিতত ডিব্ৰুগড় জিলা আয়ুক্তৰ ওচৰত মনোনয়ন পত্ৰ দাখিল কৰে। একেদৰে বৰছলা সমষ্টিৰ বাবে শোণিতপুৰ জিলা উপায়ুক্তৰ কাৰ্যালয়ত মনোনয়ন পত্ৰ দাখিল কৰে প্ৰাক্তন সাংসদ ৰিপুন বৰাই। উল্লেখ্য যে শিৱসাগৰ আৰু ডিব্ৰুগড় জিলাৰ কংগ্ৰেছ আৰু মিত্ৰজোঁটৰ প্ৰাৰ্থীসকলে মনোনয়ন পত্ৰ দাখিল কৰাৰ সময়ত অসম প্ৰদেশ কংগ্ৰেছ কমিটিৰ সভাপতি গৌৰৱ গগৈ উপস্থিত থাকে। এখন বৰ অসম গঢ়াৰ স্বাৰ্থত কংগ্ৰেছ আৰু মিত্ৰজোঁটৰ প্ৰাৰ্থীক ভোট দি ভ্ৰষ্টাচাৰী হিমন্ত বিশ্ব শৰ্মা আৰু সাম্প্ৰদায়িক দল বিজেপিক পৰাভূত কৰিবলৈ গৌৰৱ গগৈয়ে আহ্বান জনায়। ইফালে অহা ২৩ মাৰ্চত মনোনয়ন পত্ৰ দাখিলৰ বাবে কংগ্ৰেছ আৰু মিত্রজোঁটৰ প্ৰাৰ্থীসকলে ইতিমধ্যে প্ৰস্তুতি সম্পন্ন কৰি তুলিছে। কংগ্ৰেছ প্ৰাৰ্থীসকলে গুৱাহাটীৰ ৰাজীৱ ভৱনৰ পৰা ‘এ’ ফৰ্ম আৰু ‘বি’ ফৰ্ম সংগ্ৰহ কৰিছে। নদুৱাৰ সমষ্টিৰ বাবে কংগ্ৰেছ প্ৰাৰ্থী সুনীল ছেত্ৰী, নলবাৰী সমষ্টিৰ বাবে অশোক শৰ্মা, ৰঙানদী সমষ্টিৰ বাবে জয়ন্ত খাউণ্ডকে ধৰি আজি প্ৰায় ৩০জন প্ৰাৰ্থীয়ে ৰাজীৱ ভৱনৰ পৰা নথি-পত্ৰ সংগ্ৰহ কৰে। ইফালে কংগ্ৰেছৰ দিছপুৰ সমষ্টিৰ প্ৰাৰ্থী মীৰা বৰঠাকুৰ আৰু নিউ গুৱাহাটী সমষ্টিৰ প্ৰাৰ্থী শান্তনু বৰাই সোমবাৰে মনোনয়ন পত্ৰ দাখিল কৰিব। এই অনুযায়ী শান্তনু বৰাই ৰাজীৱ ভৱনৰ পৰা আৰু মীৰা বৰঠাকুৰে দিছপুৰস্থিত মানৱেন্দ্ৰ শৰ্মা কমপ্লেক্সৰ পৰা শোভাযাত্ৰা কৰি মনোনয়ন দাখিল কৰিব প্ৰদেশ কংগ্ৰেছৰ মিডিয়া বিভাগে জানিবলৈ দিয়ে।