৭৫% নম্বৰ লাভ কৰা ছাত্ৰ-ছাত্ৰীয়ে লাভ কৰিব স্কুটী

নিউজ ডেক্সঃএইবাৰৰ উচ্চতৰ মাধ্যমিক পৰীক্ষাত উত্তীৰ্ণ হোৱা প্ৰায় ৩৬ হাজাৰ মেধাৱী ছাত্ৰ-ছাত্ৰীৰ মাজত অসম চৰকাৰে স্কুটী বিতৰণ কৰিব। ২৫৮.৯ কোটি ব্যয় সাপেক্ষে এই কাৰ্যসূচী ৰূপায়ণৰ প্ৰস্তাৱ বুধবাৰে ৰাজ্যিক কেবিনেটে গৃহীত কৰে বুলি শিক্ষামন্ত্ৰী ৰনোজ পেগুৱে মুখ্যমন্ত্ৰী হিমন্ত বিশ্ব শৰ্মাৰ সভাপতিত্বত অনুষ্ঠিত বৈঠকৰ পিছত সাংবাদিকৰ আগত কয়। তদুপৰি মুঠ ৩৫,৮০০ গৰাকী ছাত্ৰ-ছাত্ৰীয়ে প্ৰথম বিভাগ লাভ কৰা ২৯,৭৪৮ গৰাকী ছোৱালী আৰু ৭৫% নম্বৰ লাভ কৰা ৬,০৫২ গৰাকী ল’ৰাই স্কুটাৰসমূহ লাভ কৰিব বুলিও তেওঁ কয়।উচ্চ শিক্ষা বিভাগেও ছাত্ৰ-ছাত্ৰীসকলক পঞ্জীয়ন আৰু বীমাৰ বাবে আৰ্থিক সাহায্য প্ৰদান কৰিব বুলিও তেওঁ লগতে কয়।মন্ত্ৰীগৰাকীয়ে কয় যে প্ৰাদেশিক মহাবিদ্যালয়সমূহত নিৰ্দিষ্ট দৰমহাৰ বাবে কাম কৰা সহকাৰী অধ্যাপকসকলৰ মাহিলী পাৰিতোষিক ৫৫ হাজাৰ লৈ বৃদ্ধি কৰাৰো সিদ্ধান্ত গ্ৰহণ কৰা হৈছে বুলিও মন্ত্ৰীগৰাকীয়ে কয়।কেবিনেটে ভৈয়ামত থকা পাহাৰীয়া জনজাতি আৰু পাহাৰত থকা ভৈয়াম জনজাতিক প্ৰমাণ পত্ৰ প্ৰদানৰ নিৰ্দেশনা সন্দৰ্ভত সিদ্ধান্ত লোৱা বুলি পৰ্যটন মন্ত্ৰী জয়ন্ত মল্ল বৰুৱাই জানিবলৈ দিয়ে।ৰাজ্য চৰকাৰে প্ৰদান কৰা অৰ্থনৈতিক, শৈক্ষিক আৰু নিয়োগৰ সুবিধা লাভ কৰাত সহায়ক হোৱাকৈ ‘মিছন ভূমিপুত্ৰ’ৰ অধীনত উপ-আয়ুক্তসকলে জাতিৰ প্ৰমাণ পত্ৰ প্ৰদান কৰিব বুলিও তেওঁ কয়।পৰ্যটন বৃদ্ধিৰ বাবে হায়াট গ্ৰুপে কাজিৰঙাত এখন হোটেল গঢ়ি তোলাৰ সিদ্ধান্তও লোৱা হৈছে বুলি বৰুৱা ডাঙৰীয়াই কয়।