গুৱাহাটীত আজি কেজৰিৱালৰ বিশাল জনসভা

গুৱাহাটী,২ এপ্ৰিলঃ পাঞ্জাৱৰ মুখ্যমন্ত্ৰী ভগৱন্ত সিং মানক লৈ আজি দিনৰ ভাগত গুৱাহাটীত উপস্থিত হ’ব দিল্লীৰ মুখ্যমন্ত্ৰী অৰবিন্দ কেজৰিৱাল। দুয়োজন নেতাৰ আগমণক লৈ তৎপৰ আম আদমি পাৰ্টী, অসমৰ নেতা-কৰ্মী। আপৰ দুই শীর্ষ নেতাই আজি দুপৰীয়া গুৱাহাটীৰ সোণাৰাম
হাইস্কুল খেলপথাৰৰ পৰা অসমবাসীক উদ্দেশ্যি ভাষণ দিব। দিল্লীৰ মুখ্যমন্ত্ৰীৰূপে শপত লোৱাৰ পাছত আজি প্ৰথমবাৰৰ বাবে অসমলৈ আহিব কেজৰিৱাল। কেজৰিৱালৰ আগমণক লৈ ইতিমধ্যে অসমৰ ৰাজনৈতিক মহলত ব্যাপক চৰ্চা হৈছে। আপৰ মুৰব্বীজনে অসমৰ মাটিত ভৰি দিয়াৰ পূৰ্বে অসমৰ মুখ্যমন্ত্ৰী হিমন্ত বিশ্ব শৰ্মাই তীব্র প্রতিক্রিয়া প্ৰকাশ কৰি তেওঁৰ বিৰুদ্ধে কিবা ক’লেই গোচৰ তৰাৰো হুংকাৰ দিছে। এক কথাত প্ৰত্যাহ্বান জনাইছে। অৱশ্যে এই প্ৰত্যাহ্বানক কেজৰিৱালে কিদৰে গ্ৰহণ কৰে সেয়া তেওঁৰ ভাষণত দেখিবলৈ পোৱা যাব। ইফালে কেজৰিৱালৰ আগমণক লৈ উৎসাহিত হৈ পৰিছে আপৰ অসমৰ নেতা-কৰ্মী। আপৰ দুই হাইপ্ৰ’ফাইল নেতাৰ উপস্থিতিত আয়োজন কৰা গণ সমাৱেশত ১০ সহস্রাধিক লোকে ভাগ ল’ব বুলি আশা কৰা হৈছে। এক কথাত এই সমাৱেশৰ জৰিয়তে আপে অসমত শক্তি প্ৰদৰ্শন কৰিব। জানিব পৰা মতে দিনৰ ১ বজাত লোকপ্রিয় গোপীনাথ বৰদলৈ আন্তঃৰাষ্ট্ৰীয়
বিমানবন্দৰত উপস্থিত হ’ব অৰবিন্দ কেজৰিৱাল আৰু ভগৱন্ত সিং মান। বিমানবন্দৰৰ পৰা তেওঁলোক আহিব সোণাৰাম হাইস্কুল খেলপথাৰলৈ। দিনৰ প্ৰায় ২ বজাত কেজৰিৱালে অসমবাসীক উদ্দেশ্যি ভাষণ আগবঢ়াব। ভগৱত সিং মানক লৈ সোণাৰাম হাইস্কুল খেলপথাৰৰ পৰা
অসমত আনুষ্ঠানিকভাৱে ৰনডংকা বজাব কেজৰিৱালে। বিয়লি তেওঁ দিল্লীলৈ উভতিব ৷